Tre vite pas ndarjes nga jeta të bashkëshortit Rene Angelil, Celine Dion ndihet gati për të rifilluar nga e para.
“Jeta ime nisi në moshën 50- vjeçare”, u shpreh këngëtarja në intervistën më të fundit për “Elle”, shoqëruar nga një shërbim fotografik ku Celine, shfaqet më ekstravagante se kurrë.
Lateks, bustierë dhe trupore, janë veshjet e imazhit të saj të ri, prej gruaje që nuk ka frikë të rifillojë jetën atëherë kur shumica e grave vendosin të tërhiqen.
“Ndihem si 1 vjeçe'”, thotë ajo, “Ndihem e lumtur, ndihem e bukur.”
E në fakt, pak gra në botë kanë patur mundësinë të jenë kaq të famshme, kaq të pasura, kaq të vlerësuara dhe gjithsesi, kaq të trishtuara sa Celine, e cila i qëndroi pranë bashkëshortit deri në momentet e fundit të jetës, teksa ai luftonte kancerin.
Sot, mamaja e 3 djemve thotë se i ka lënë të gjitha pas dhe nuk ka ndërmend të merret me komentet e njerëzve. Vetëm pak kohë pasi mbeti e ve, daljet e shpeshta në publik me balerinin 35-vjeçar Pepe Muños, ngjallën dyshime se ikona e muzikës po gjente ngrohtësi në krahët e një partneri më të ri se vetja.
Kjo lidhje u mohua nga Celine, e cila tha se një aludim i tillë nuk kishte vend, pasi ende nuk e kishte kapërcyer dhembjen.
Megjithatë, tashmë duket se ka mësuar t’i kapërcejë edhe komentet e njerëzve, siç u shpreh edhe për “Elle”:
“Po e stakove trurin, të tjerët s’do merren më me ty. Nuk po them se s’më intereson fare se çfarë mendojnë të tjerët për mua, por jam në një moment të jetës, kur dua t’i marr vetë vendimet për veten.”
“Nuk është kurrë vonë për t’ia rinisur. Jam 51, por ndihem si të jem në lule të moshës!”
