Transplanti i veshkës vitin e kaluar, ishte një moment tejet i vështirë për të. Një vit më vonë, Selena Gomez rikthehet me një shërbim fotografik shumë sensual, për të promovuar linjën më të re të bikinive, të cilat Selena i ka dizajnuar vetë për markën Krahs Swim.
“Një prej dizajneve që krijova, ishte me bel të lartë dhe rrip në mes. Unë kam kaluar një transplant veshke dhe më pëlqejnë kostumet e plazhit që le të themi, mbulojnë atë që ka ndodhur, më bëjnë të ndihem rehat.”, u shpreh ajo.
Vetëm këtë muaj, Selena Gomez mundi të rikthehej plotësisht për t’i dedikuar kohë fansave të saj të shumtë si edhe bizneseve me të cilat bashkëpunon.
Transplanti i veshkës në mars të vitit të kaluar, të cilën ia dhuroi mikesha e saj Francia Raisa, la pasoja të pashlyeshme për këngëtaren e cila në tetor, pati një krizë të rëndë nervore, pas së cilës vendosi të shkëputej tërësisht nga vëmëndja mediatike për të rimarrë veten në një qendër rehabilitimi.
Pas dy muajve terapie intensive, në janar Selena u rikthye më në fund në Instagram, për të falenderuar ata që gjatë gjithë kësaj kohe e mbështetën dhe i uruan më të mirën.
“Ky vit që kaloi ishte përfundimisht një vit vetë-reflektimi, sfidash dhe rritjeje. Janë këto sfida që të tregojnë kush je me të vërtetë dhe sa shumë je i aftë të përballosh.
Besomëni, nuk është e lehtë, por unë jam krenare për njeriun që po bëhem dhe mezi po pres për vitin që do të vijë. Ju dua.”, shkroi ajo në postimin e rikthimit.
Muajin e fundit, Selena është kthyer me forca të plota dhe ka lajmëruar fansat se po përgatit edhe një album të ri, ndërsa në mars, u shfaq krah Benny Blanco-s në videon e këngës “I Can’t Get Enough”.
