Gjatë hapjes së Panairit të Punës ditën e djeshme, Zëvendësministria e Arsimit, Sportit dhe Rinisë Lorena Haxhiu la një shprehje për t’u përmendur gjatë fjalimit të saj:
“Është e rëndësishme t’ia nisni me punë sepse atë që ju do të korrni, do të mbillni në të ardhmen”.
Pas një ditë-nate të shenjuar nga lajmet, meme-t dhe shakatë nëpër internet për atë që u konsiderua gafa më e nxehtë e momentit në kategorinë e gafave të politikanëve, sot Zëvendësministria reagoi përmes një statusi në Facebook.
Që do të cekte ndikimin e madh të medias në përhapjen e kësi lajmeve, këtë e prisnim. Por, ajo që nuk pritej ishte mbrojtja që Lorena Haxhiu i bëri shprehjes së saj, duke treguar se në fakt, ajo nuk e paska patur aspak gabim, madje se fraza e famshme popullore u tha qëllimisht mbrapsht prej saj.
“Atë që ju do të korrni (në panairin e punës), atë do të mbillni dhe në të ardhmen (në tregun e punës)!” ishte fjalia ime përmbyllëse drejtuar të sapodiplomuarve, teksa prisnin të vizitonin stendat, për të korrur frytet e punës së tyre, pas vitesh të tëra studimi, lodhjeje, mundi e sakrifice.
Duket që nuk paska patur mjaftueshëm lajme të këqija dje… Nice try”, shkruan Lorena Haxhiu, duke lënë të kuptohet se sado mediat u përpoqën, në fakt ajo i zuri vetë në kurth pasi thënia e saj, ishte krejtësisht e mirëmenduar.
Në statusin reagues në Facebook, Zëvendësministria nuk la pa shprehur në mënyrë metaforike as mendimin e saj në lidhje me mediat, duke i krahasuar ato me një makineri ku ato çfarë thuhen, nxirren jashtë kontekstit.
‘”Ka tekst, por ka edhe kontekst” – citonte dikur një profesori im në auditoret e fakultetit.
M’u kujtua sot, teksa portalet e futën në makinerinë e tyre dhe e nxorrën të deformuar e jashtë kontekstit fjalën time të djeshme në çelje të Panairit të Punës.’, shkruan Haxhiu.
Përveç për pozicionin e saj të ri ministror, Lorena Haxhiu nuk është e panjohur për median dhe televizionet.
Kur në shkurt ajo u emërua zëvendësministre e Arsimit, Sporteve dhe Rinisë, si pjesë e një sërë riemërimeve në kabinetin e kryeministrit, Lorena Haxhiu qe ndër emrat e rinj që më tepër ranë në sy, për shkak se më parë, ka qenë prezantuese e disa programeve televizive.
Ajo e nisi me emisionet “On Air Selected” dhe “100 % shqip” tek “Shijak TV”, për ta vijuar karrierën mediatike në televizione si “Albanian Screen” e më vonë në “Vizion Plus”, ku drejtoi emisionin “Dita Ime”.
Lorena Haxhiu ka mbaruar studimet master për shkencat e marketingut në Fakultetin e Ekonomisë dhe përpara se të emërohej zëvendësministre e ministres Besa Shahini, ajo ka mbajtur postin e drejtoreshës së Shërbimit Rinor, një drejtori në varësi të Ministrisë së Arsimit, Sporteve dhe Rinisë.
