Xheison mund të quhet padyshim fëmija më i famshëm në këtë sezon të dytë të emisionit “Në kurthin e Piter Pan”.
Por vizita e Alketa Vejsiut në fshatin e tij dhe apeli i saj për ta ndihmuar Xheisonin, pasi jeton në kushte të vështira nuk është pritur edhe aq mirë nga Olti Curri. Ai mendon se figura e Xheisonit po shfrytëzohet nga produksioni dhe madje po e shndërron atë në lypës.
Ja çfarë shkruan konkretisht Olti në një postim në Instastory:
“Në fakt Xheisoni është pika më e fortë dhe e vetme e këtij sezoni tek “Në kurthin e Piter Pan”. Produksioni le të fusë më pak në xhep dhe të paguajë për atë që meriton ky personazh dhe jo ta shndërrojë në ‘lypës’. Xheisoni meriton të paguhet më shumë se kushdo tjetër në atë spektakël sepse pa atë, spektakli do ishte një funeral me sigla hapje dhe mbyllje, asgjë më shumë”.
Alketa Vejsiu ka qenë ditën e djeshme në fshatin Mushqeta, fshat i cili është bërë i njohur pas pjesëmarrjes së Xheisonit të vogël në emisionin për fëmijë “Në kurthin e Piter Pan”.
Ajo shpeshherë në emision ka përmendur se do t’i ndryshojë jetën këtij djali, prandaj ka kërkuar ndihmën e ndjekësve të saj, fansave dhe kujtdo që e pëlqen Xheisonin që të kontribuojnë me sa të munden për rikonstruktimin e shtëpisë, pasi siç e tregoi Alketa përmes postimeve, shtëpia e vogëlushit nuk ishte aspak në kushte të mira.
