Duket si një ironi e fatit, por efektivja që dikur protestonte kundër prishjes së shtëpisë së saj, po përballet me një situatë të ngjashme edhe pse ndodhet në kahun tjetër këtë herë.
Blerta Dervishi, efektivja e policisë e cila protestoi kundër prishjes së shtëpisë së saj pranë “Petro Nini Luarasit”, ishte sot në krye të detyrës në mesin e efektivëve të policisë që po bëjnë të mundur nxjerrjen nga shtëpia të banorëve të Bregut të Lumit, të cilët preken nga zgjatimi i Bulevardit të Ri.
“Report Tv raporton se pavarësisht detyrës, ajo duket se ka një lloj ndjeshmërie ndaj banorëve dhe nuk është përpjekur të ndërhyjë me forcë edhe pse ka hasur në rezistencën e tyre.
Blerta Dervishi protestoi bashkë me 14 të afërm të saj kundër prishjes së shtëpisë dhe për këtë arsye u pezullua nga detyra por u rikthye sërish të nesërmen.
Ndërkohë, sot pati një situatë të tensionuar në Bregun e Lumit, pasi dy deputetët Klevis Balliu dhe Endrit Braimllari u përplasën me efektivët e policisë.
