Safija shkoi sot në “Ka një mesazh për ty” për të treguar historinë e dhimbshme të jetës së saj dhe të së ëmës Fahrije që ka vuajtur dhunën e bashkëshortit.
Babai i saj ishte aq i dhunshëm sa kishte tentuar të mbyste të gjithë fëmijët. Safija tregoi sot në emision se nëna e saj ka vuajtur gjithë jetën për të rritur tetë fëmijë. Ajo është divorcuar që në moshën 38-vjeçare pasi bashkëshorti ishte i dhunshëm me të edhe fëmijët.
Dyshja kishin pasur një jetë të lumtur për rreth pesë vite, por pse u prish marrëdhënia e tyre?
“Xheloz nuk ishte, sepse njeri përparimtar ishte fotograf, shofer. Nuk di ta shpjegoj se si. Zënkat ditë pas dite gjithnjë e më keq. Pas 8 viteve shkuam në qytetin e Shkodrës se mos lumturohen. Është rrënqethëse të tregoj gjithë historinë”, tha Safija.
Ardit Gjebrea veçoi episodin e dhunës që ai një ditë ushtroi jo vetëm ndaj gruas, por edhe ndaj gjithë fëmijëve duke i lidhur me tela me gjemba.
“Po është e vërtetë. Të më fali publiku se kur e kujtoj këtë histori, isha 13 vjeçe edhe shkaku ishte një kec që na e kishte blerë gjyshi për meshë dhe ishte ditë pranvere, për ta prerë për dimër. Gjoja se kullotën kecin motrat dhe vëllezërit e mi se unë bëja punët e shtëpisë, nëna ishte në punë në fermë dhe rrinte me orar të gjatë. Pasi i rrahu të gjithë edhe mua bashkë me ata, përfunduam të lidhur me tela bakri me gjemba, duart sikur të ishim të burgosur na shtriu në mes të qylymit dhe na hidhte ujë për të na mbytur të gjithëve. Ne nuk guxonim të bërtisnim të nxirrnim zë nga goja. Për fatin tonë të mirë erdhi një mësues për të na regjistruar për shkollë, ne ishim në katin e dytë, ndërsa ai shkoi poshtë për t’i dhënë shpjegime mësuesit, nuk dinte se në çfarë klase ishim dhe mësuesi u nevrikos. Aty më ka mbetur peng gjithë jetën pse nuk bërtita se ishte koha e Enverit dhe kishte përfunduar në burg për gjithë jetën. Mësuesi iku dhe ishte fati jonë, sepse na thoshte do ju mbys me ujë të nxehtë. Më pas na mbylli brenda dhe doli iku tek komshinjtë nga ora 10 deri në 5 të pasdites. Këtë nuk ja fal kurrë! Pastaj erdhi nëna na gjeti të gjithë të lidhur, u step, ngeli pa fjalë. Nuk guxoi të na zgjidhte, kërkoi ndihmën e komshinjve dhe gjeti babain që i tha shko zgjidhi se jam betuar që nuk i zgjidh. Kur na zgjidhi nëna telat na kishin mbetur në mish. Nuk më dhimbte vetja, por më i vogli ishte 6 vjeç. Të gjithë pesë fëmijë të lidhur në tela”.
Safija pranoi se ka dashur ta vrasë të atin bashkë me motrat e vëllezërit, por i ka penguar nëna:
“Kemi dashur ta mbysim, kemi dashur t’i hedhim ujë të vluar, nëna na ka penguar, sepse e keni baba na ka thënë. Sot që jam prind edhe gjyshe e falenderojë shumë nënën time, pavarësisht se ne vuajtjet i kemi në kurriz. Nënës time si del borxhit kurrë babai im. Kur u bëra 15 vjeçe iku dhe ndenji larg nesh, nuk solli rrogë në shtëpi, ai ishte martuar dhe nëna bëri divorcin. Na ka rritur me borxhe. Në gjykatë fëmijët e mëdhenjë me babain dhe fëmijët e vegjël me nënën. Trupit gjykues i thashë që do bëhem unë dado, ne nuk ndahemi, nëna le të martohet dhe babai le të martohet. Edhe gjyshi na la shtëpinë”.
Babai i Sadijes sot jeton dhe është martuar tre herë pas ndarjes me nënën, ndërsa nëna jeton në Shkodër me djalin e vogël.
/Klan
