Aktori i mirënjohur shqiptar Bujar Asqeriu ka pasur jo një herë por disa herë kërkesa për të qenë në krye të Teatrit Kombëtar të cilat i ka refuzuar.
Në intervistën e tij sot në emisionin “Xing me Ermalin”, aktori u shpreh se i ka qëndruar besnik profesionit të tij që ka zgjedhur në jetë dashuria për të cilin nuk shteron asnjëherë.
Bujari u shpreh se nuk i ka pëlqyer asnjëherë formati zyrtar, ashtu siç i pëlqen arti dhe performanca skenike.
“Mua më kanë ofruar, jo një herë, por disa herë dhe nuk kam pranuar sepse unë kam investuar për këtë profesion që kam zgjedhur në jetë dhe sigurisht është një profesion i palimituar, nuk përfundon kurrë, çdo ditë, çdo muaj, çdo vit të punosh, sado që të krijosh, prapë ky profesion dhe natyrat njerëzore janë të pafundme në zbulimin e gjërave brenda vetes.
Kështu që mua nuk më ka pëlqyer asnjëherë formati zyrtar sepse të bëhesh drejtor do të jesh një zyrtar, të shkosh në zyrë, të zgjidhësh problemet.
Mua nuk më ka pëlqyer kjo, mua më pëlqen vetëm arti, performanca artistike, publiku, dua të argëtohem, dritat e skenës. Dritat e zyrës më krijojnë një impakt shumë negativ dhe më mpijnë qelizën pak nga pak dhe më krijojnë rrudha në portret”, u shpreh Asqeriu.
