Projektet e fundit muzikore të Ariana Grande-s kanë pasur mjaft sukses.
Së fundmi “Billboard” është pushtuar nga projektet muzikore të yllit të muzikës, ku kënga “7 Rings” kryeson listën, “Break Up With Your Girlfriend, I’m Bored” është në vend të dytë, ndërsa në vend të tretë është “Thank U, Next”.
Siç mund ta dini, këngëtarja me origjinë shqiptare Njomza Vitia është një nga shoqet e ngushta të Arianës, megjithatë çka mund t’ju ketë shpëtuar si informacion është fakti se ajo ka kontribuar në realizimin e teksteve të dy super hiteve “7 Rings” dhe “Thank U, Next”.
Për “Billboard.com”, ajo është shprehur: “Teksa po shkruaja (këngën) isha duke bërë qejf dhe po kaloja shumë mirë në studio. Nuk pata asnjë pritshmëri, por tani që shoh se është numër njëshi në botë është gati surreale (e pabesueshme). Është pa diskutim një bekim.”
Për ata që nuk e dinë, 24-vjeçarja Njomza ka lindur në Chicago dhe është me origjinë nga Kosova. Ajo merret me muzikë prej nëntë vitesh.
Rikujtojmë se ka qenë Njomza ajo e cila ka prezantuar Ariana Grande-n me Mac Miller, i cili u nda nga jeta më 7 shtator të 2018-ës si pasojë e një mbidoze droge.
