Një histori e tmerrshme, në kufijtë e perversitetit, është ajo e Kavajës, ku disa nxënës të shkollës “Rilindja” kanë përdhunuar një 13-vjeçare.
Rasti në fjalë u bë publik vetëm pas një denoncimi në “Facebook” nga ish-kryeministri Sali Berisha.
Burime nga grupi hetimor bënë me dije se të gjithë djemtë e arrestuar e kanë pranuar që kanë kryer marrëdhënie seksuale me vajzën e mitur.
Ata kanë thënë se e merrnin vajzën në shtëpinë e tyre pas përfundimit të shkollës.
Pasi përfundonte njeri, të nesërmen shkonte në shtëpinë e një djali tjetër pasi i bënin presion vajzës me videon që posedonin.
E gjitha ndodhte kur në banesat e tyre nuk kishte njeri dhe kur prindërit e tyre ishin në punë. Policia dhe Prokuroria kanë marrë në pyetje mësuesen kujdestare, drejtoreshën e shkollës, por këto kanë deklaruar se nuk dinin gjë.
Mbi këto dëshmi pritet që prokuroria e Durrësit të kërkojë arrest me burg për të shtatë të ndaluarit.
Mësohet se prokurore e çështjes është Oltiana Cifligu ndërsa gjyqtare Nurjeta Tafa.
Vajza e mitur ka pranuar abuzimin nga djemtë dhe ka rrëfyer për kërcënimet ndaj saj, gjithashtu në prani të psikologes dhe punonjëses sociale.
Ndërkohë, jashtë Gjykatës i ra të fikët një gruaje, nënës së një prej djemve të akuzuar.
Një tjetër detaj ka dalë në pah së fundmi. Në janar ngjarja është zbuluar rastësisht nga pastruesja e shkollës e cila ka njoftuar mësuesen kujdestare dhe kjo e fundit ka vënë në dijeni drejtoreshën e shkollës si dhe prindërit.
