Fluksi i madh dhe i papërballueshëm në sekretaritë e universiteteve është bërë shkas për shtyrjen e afatit të dorëzimit të dokumenteve për të përfituar nga përgjysmimi i tarifave në universitete.
Lajmi është dhënë nga kreu i qeverisë Edi Rama në takimin e përjavshëm me koordinatorët e platformës së bashkëqeverisjes.
Pra, për ata studentë, të cilët janë përfitues të bursave por që ende nuk kanë përfunduar dokumentet e aplikimit, do të ketë më shumë kohë në dispozicion se afati i mëparshëm që ishte vendosur 31 janari.
Kriteret për bursat
Lidhur me kriteret e përfitimit të bursave dhe reduktimit të tarifave, ministrja Shahini ka konfirmuar se sa i takon paqartësive të hasura shpesh mes studentëve për notën mesatare 9-10 do të merret parasysh mesatarja e vitit paraprak, për ata studentë që kanë shlyer të gjitha detyrimet. Ndërsa për studentët e viteve të para do të merret parasysh mesatarja e shkollës së mesme dhe e provimeve të Maturës Shtetërore.
Gjithashtu ministrja ka shtuar se për kategoritë e veçanta, si studentët në nevojë ekonomike, studentët me nevoja të veçanta etj, deri vjet bursa është dhënë nga bashkia ndërsa sivjet nga janari është bursë që jepet nga qeveria. Për të siguruar këtë bursë studentët duhet të paraqesin vërtetimin përkatës, në sekretarinë e universitetit për të përfituar reduktimin e tarifës së shkollimit.
Punësimi në administratë
Shtyrje do të ketë dhe për afatin e aplikimit të studentëve të ekselencës që duan të punësohen në administratë, raporton “Klan tv”.
Vetëm pas ankesave të qytetarëve në platformën e bashkëqeverisjes janë pushuar nga puna 300 punonjës të administratës.
