Kanë kaluar 5 vite që kur Kim Kardashian dhe Kanye West kurorëzuan dashurinë e tyre në Itali dhe më në fund, Chrissy Teigen dhe John Legend kanë konfirmuar njërin nga thashethemet më të mëdha, për atë që ndodhi në ceremoni.
Bëhet fjalë për një sherr të madh që paska pasur modelja me këngëtarin, dhe që sipas saj ka ndodhur për shkak të pasigurisë që ndjente ajo në atë kohë.
Chrissy Teigen dhe John Legend kanë folur në emisionin “Watch What Happens Live” për këtë incident, për të cilin modelja tha se duhet ende t’i kërkojë falje Kim-it dhe Kanye-s.
“Unë as që e mbaj mend për çfarë ishte. Nuk mendoj se ata morën vesh gjë”, u shpreh Legend.
“Ishte një shpërthim i madh”, vijoi Teigen.
“Oh të gjithë e morën vesh. Mendoj se isha shumë e frikësuar dhe kjo ndodhi nga një pasiguri e madhe”, vijon modelja.
Ajo tregon se u mbingarkua nga të gjithë ata “njerëz të mrekullueshëm e të mahnitshëm” që ndodheshin në ceremoninë e martesës së vitit 2014 në Itali.
“Kam qenë shumë e pasigurt dhe e dehur, kështu që kjo nuk më ndihmoi aspak”, tha Chrissy.
