Viti që shkoi do të mbahet mend për plagjiaturat më të mëdha të diplomave në radhët e politikanëve shqiptarë. Por skandalet nuk mbarojnë me kaq.
Deputeti socialist Sadri Abazi është diplomuar nga Akademia IRU, në Gjenevë, në vitin 2002.
Por përmes një kërkimi që realizoi “Top Story”, nëse futesh në faqen online të kësaj akademie, aty shikon se në fakt programet e saj janë kurse trajnimi për shoferët e kamionëve.
IRU në fakt është shkurtim për “International Road Union”. Që do të thotë Unioni Ndërkombëtar i Rrugëve. Ky union paska edhe atë degë të vetën që quhet akademi dhe që shkruhet “Akademia IRU”.
Akademia IRU, trajnon me mijëra shoferë dhe operatorë transporti çdo vit për të pasur një siguri më të madhe në rrugë. Kaq mjafton për të kuptuar se Sadri Abazi ka bërë vetëm një kurs shoferësh në Gjenevë, dhe jo shkollë të lartë siç e ka paraqitur në CV, raporton “Top Channel”.
Ilir Ndraxhi është një deputet tjetër i Partisë Socialiste që në CV e tij deklaron se 10 vitet e para të punës, ai ka qenë një shofer i thjeshtë. Më pas është bërë biznesmen. Ai shkruan se ka arsim të lartë si inxhinier pyjesh, por mesa duket këtë shkollë e ka bërë vetëm pasi i ka hyrë rrugës së politikës. Por pse një person me diplomë në inxhinieri nuk do të punonte 10 vite si shofer i parkut të mallrave?
Gjithashtu, ish-ministrja Lindita Nikolla shkruan në CV e është diplomuar për matematikë në vitin 1989, në Fakultetin e Shkencave të Natyrës, Universiteti i Tiranës. Por nga një vërtetim që u bë publik gjatë protestës studentore në dhjetorin e kaluar, u zbulua se znj. Nikolla e ka mbaruar fakultetin me mesataren 5.8.
Por, gjithashtu në CV ajo shkruan se është diplomuar në nivelin master në Albanian University në vitin 2010, në Administrim Publik drejtimi Pushtet Ekzekutiv. Arsyen se përse ish-ministrja Nikolla e ka mbaruar masterin me kaq vonesë dhe në këtë universitet kuptohet nëse shohim deklarimin e saj të pasurisë.
Kur ajo deklaron të ardhurat e bashkëshortit, vihet re që bashkëshorti i saj ka punuar si pedagog pranë këtij Universiteti, ku ajo ka mbaruar masterin.
Burimi: Top Channel
