Studentët vijojnë të qëndrojnë përpara Kryeministrisë, pavarësisht temperaturave të ulëta dhe reshjeve të shiut, duke ngulur këmbë që të firmosen tetë pikat nga kryeminstri Edi Rama. Ndërkohë që ky i fundit, i lutet nga “Instagrami” që të dialogojnë përmes memeve të krijuara në rrjetet sociale.
Pasditen e sotme, situata u tensionua përpara Kryeministrisë pasi policia bllokoi ngrohëset prej gazi, të sjella nga studentët për t’u ngrohur. Kjo ka sjellë irritimin e grupit të vogël të studentëve që po protestojnë në ditën e 10-të të protestës.
“Punonjësit e policisë na penguan, këtu është bërë një shtetrrethim, te kjo rruga kam numëruar 10 policë, janë shtuar forcat e policisë kudo. Nuk plotësuan procervebal për ata që morën. Nuk tërhiqemi nga qëndresa jonë natën. Kryeministri mund të deklarojë çfarëdolloj gjëje në media, por ky është realiteti”- u shpreh njëri prej studentëve për “News24”.
Nga ana tjetër, ata akuzojnë Ramën se po blen me para 200 studentë për të realizuar një “show” ku do të dialogojnë.
“Edi Rama po blen studentë, rreth 200 studentë. U ka dhënë lekë për të realizuar gjoja një takim për dialog. Ata nuk janë pjesë e jona dhe ne do i demaskojmë. Nesër i ftojmë të gjithë të protestojnë”, thanë studentët.
Studentët theksojnë se nuk do t’i ndalin protestat dhe ditën e nesërme do të protestojnë sërish përpara Kryeministrisë.
