Pas dy muajsh në arrati, policia ka arrestuar Fabjol Alushin, një nga personat e shpallur në kërkim për masakrën në zonën e ish-Bllokut me katër tetor. Ai ka qënë i pranishëm në klubin “Monopol”, ku humbi jetën 28-vjeçari Fabian Gaxha, ndërsa mbetën të plagosur Ervis Martinaj dhe Eljon Hato.
“Shqiptarja.com” raporton se 42-vjeçari i arrestuar ditën e sotme, është mik me të fejuarin e këngëtares Elvana Gjata, Ervin Mata si dhe me Merviol Bilon, komando që vrau trupojën e Ervis Martinaj. Alushi ndodhej në të njëjtën tavolinë me ta, ditën e përleshjes në zonën e ish-Bllokut.
Të shpallur në kërkim për ngjarjen janë Meviol Bilo, Ervin Mata, si edhe biznesmeni Eldi Dizdari. Sakaq, Elvana Gjata dha deklaratë e saj për policinë, pas përfundimit të afatit 30 ditor. Ajo sqaroi se kishte shkuar të takonte të dashurin me të cilin bashkëjetonte prej një viti për t’i dhënë çelësin e shtëpisë, me argumentin se pas disa orësh do largohej nga Shqipëria. Po ashtu, e pyetur nëse ka patur komunikim me Ervinin pas ngjarjes, ajo e ka mohuar të ketë folur me të dhe se nuk ka dijeni për vendndodhjen e tij.
Në bazë të dëshmive të personave të pyetur, por edhe hetimeve nga grupi hetimor, rezulton se shkak për sherrin nuk ka qenë ngacmimi i këngëtares, por një sherr i mbartur i të fejuarit të saj, Ervin Mata, me disa persona të tjerë, ku përmendet emri i biznesmenit Eldi Dizdari. Ky i fundit është partneri i ish-Miss-it, Suada Sherifi.
Shkak i mosmarrëveshjes dyshohet një sasi e konsiderueshme kokaine. Mata nuk i është përgjigjur Dizdarit për këtë ngarkesë dhe mes tyre për sqarim hyri biznesmeni Ervis Martinaj, i cili është edhe një nga dy të plagosurit në lokalin ku ndodhi ngjarja.
