Disa mesazhe ku tregohet se anëtarë të Partisë Demokratike po koordinojnë protestën e studentëve në Tiranë, janë publikuar sot në rrjetet sociale.
Nuk dihet ende vërtetësia e tyre, megjithatë në bazë të bisedave kuptohet se Grida Duma, u kërkon studentëve që protesta tek “Zogu i Zi” të vazhdojë sa më gjatë në mënyrë që askush të mos shkojë në “Top Channel”.
Në studion e “Top Show” ishte parashikuar përballja mes studentëve dhe kryeministrit Rama.
“Në vëmendjen tuaj të keni porosinë që të mbahet sa më gjatë Zogu i Zi që të mos shkojë njeri tek Top Show”, shkruhet në foton e publikuar.
Por Partia Demokratike e ka cilësuar si një montazh këtë foto dhe sajesë të qeverisë.
“Mediave u është shpërndarë nga qeveria një fotomontazh me emrat e disa drejtuesëve të PD-së. Fotomontazhi ka për qëllim të tregojë se në parti është ngritur një grup që koordinon protestën e studentëve. Kjo është një sajesë e propagandës banale të Edi Ramës, i kapur nga paniku për shkak të gjithë protestave në të gjithë Shqipërinë. Jemi në dijeni se po ju bëhet presion për ta publikuar, por është në nderin tuaj të mos bini pre e mashtrimit të trashë qeveritar. Ju keni çdo mundësi të bëni verikimin tuaj të pavarur, për të provuar se ky është fake neës”, është shprehur PD.
Pak më parë edhe kreu i qeverisë foli për presionin që po ushtron PD ndaj protestës:
“Ju mbytën me presionin kundër Dialogut se do ju përçaja unë,po tani kush ju përçau?! Mos e vrisni mendjen,unë jam me studentët jo me maskat e lsiPD dhe s’ju le në baltë
Jo ato pikat, po shumë më tepër se aq do bëjmë së bashku. Me të nisur Dialogun, s’ndalemi më #përUniversitetin”, pohon Rama.
Një pjesë e studentëve ndodhen te Kryeministria, ndërkohë, pjesa tjetër do të vijojë të qëndrojë para Ministrisë së Arsimit.
“Kemi marrë bukë me vete, na kanë sjellë e qytetarët, dhe ne do rrimë tërë natën këtu mbi libra, do lexojmë”, tha një student sipas “BalkanWeb”.
