Studiuesi Taulant Muka u bë i njohur për publikun shqiptar në muajin tetor, kur akuzoi për plagjiaturë ish-zëvëndësminitrin e Arsimit, Ervin Demon. Ai publikoi foton e një artikulli të publikuar nga Demo dhe ku rezultoi se një pjesë e konsiderueshme e tij ishte kopjuar nga libri i Janet Morrison. Pa e menduar dy herë, kryeministri Edi Rama e emëroi Taulant Mukën në postin e zëvendësministërit të Arsimit dhe Sportit. Mirëpo, pak javë më pas ai vendosi të jepte dorëheqjen duke e argumentuar se nuk pajtohej me modelin e punës të Ministrisë së Arsimit dhe Sportit.
Gjatë konferencës ditën e sotme, për protestën e studentëve në një lidhje live në ‘Facebook’, kryeministri Edi Rama foli edhe për arsyet e dorëheqjes së studiuesit Taulant Muka. Kryeministri Rama theksoi se pavarësisht deklaratave të bëra nga ana e tij, ai ka treguar se nuk është asgjë më shumë se një “Larvë politike”.
“Taulant Muka që u bë dhe personazh, nuk e meritonte. Më erdhi Lindita Nikolla në zyrë me një grup pedagogësh dhe një djalë që është në Zvicër dhe më tha që kanë një ide për këtë e atë. I thashë po silli këtu sepse kisha dëshirë t’i takoja. Erdhën në zyrën time, ishin një grup pedagogësh,njerëz të nderuar. Më shtroi platformën e tij dhe më tha: ‘Jam në Zvicër…’ Akuzoi zv/ministrin për plagjiaturë. I thashë: ‘Nëse ti akuzon zv/ministrin për plagjiaturë të ikë ai dhe merre ti bëje këtë gjë.‘Kjo që më thoni ju ishte diçka që s’e prisja’, më tha. Merreni ju si grup dhe bëje këtë gjë.
Ditë e parë: Dua veturë me shofer. Dita tjetër: Po banjën pse nuk e kam në zyrë? Pastaj: Babain e dua shofer të punësuar në Ministri. Mund të jesh shkencëtar, por nuk do të thotë asgjë. Jep dorëheqjen papritur. Një larvë, kaq, këtë mendoj unë për këtë.”, tha kryeministri Rama për ishzv/ministrin e Arsimit, Taulant Muka.
