Studentët e kanë thënë fjalën e tyre, nuk do të ndalen së protestuari derisa qeveria të plotësojë të gjitha kërkesat e tyre dhe jo, nuk pranojnë asnjë negociatë apo të përzihen me politikën!
Edhe ditën e nesërme me 8 dhjetor, të rinjtë do të mblidhen të gjithë së bashku në sheshin “Nënë Tereza” në orën 9.30 të mëngjesit. Me sloganin “Jo negociata, vetëm plotësim të kushteve”, ata i bëjnë thirrje të gjithëve t’i bashkohen protestës.
Studentët e universiteteve të rretheve do të protestojnë para universitetit përkatës, ndërkohë që të tjerët që kanë mundësi do të bashkohen në Tiranë.
Kërkesat e studentëve për Ministrinë e Arsimit:
1. Përgjysmim i tarifës së studimi
2. Rritja nga 10% në 50% e peshës totale të votës së studentëve për të zgjedhur kandidatët për dekan/rekor dhe rritja e përfaqësisë së studentëve në senatin akademik me 20%.
3. Mbështetur në nenin 99 mbi Këshillet Studentore, Ligji i Arsimit të Lartë pika 2 kërkojmë që Bordi i Administrimit të IAL-ve të ketë numër të barabartë votash si nga Ministria e Arsimit dhe Sportit dhe IAL-të dhe të shtohet një përfaqësues në këtë bord nga studentët.
4. Mbështetje e studentëve për kërkime shkencore.
5. Mbështetje e studentëve të doktoraturës me fonde për kërkimin shkencor.
6. Përmirësim i kushteve të konvikteve të Universiteteve.
7. Dyfishim i buxhetit për arsimin e lartë.
8. Pajisja e të gjithë studentëve me kartën e Studentit brenda vitit akademik 2018-2019.
