Gazetarja Sonila Mesareja u nda nga jeta këtë të premte pas një sëmundjeje të rëndë.
Ajo punoi për vite si reportere e Kronikës në disa redaksi të shtypit të shkruar dhe në shumë projekte që synuan një gazetari cilësore.
Ikja e parakohshme nga jeta e Sonilës, ka prekur kolegen e saj Eglantina Alliaj, e cila e tronditur nga ky lajm, ka bërë një dedikim prekës.
“Mikja ime, më trondite dhe më lëndove këtë mëngjes me ikjen tënde nga kjo jetë!
Ti luftove fort me atë sëmundje të mallkuar, luftove fort për vite të tëra, dhe duke të njohur ty, shpresoja që do ja dilje…por nuk ja dole dot!
Një kolege dhe gazetare e shkëlqyer, një mike shumë e shtrenjtë për mua! Të qofte dheu i lehtë Sonila Mesareja”, shkruan ajo.
Unioni i Gazetarëve Shqiptarë dha lajmin e trishtë pak orë më parë për gazetaren e ndjerë, të cilën e cilësonte si një “kolege e dashur, model i këmbënguljes dhe një profesioniste që modestinë e kishte virtyt”.
