Daniel Dobra, 18-vjeçari i cili akuzohet se ka hedhur kapsollën gjatë protestës së banorëve të Astirit, ku mbeti e plagosur policja Ina Nuka, ka kërkuar falje publike.
Ai shprehet për “Fax News” se nuk ka qenë aspak qëllimi i tij të lëndonte efektiven dhe se është dhunuar nga efektivët kur është shoqëruar.
18-vjeçari tregon se ka ndërprerë dhe shkollën pasi është arrestuar. Ai është një nxënës me rezultate të larta dhe kërkon që të lirohet sa më shpejt pasi rrezikon të humbë studimet.
“Dua të kërkoj falje publikisht, edhe nëse është kapsolla që kam hedhur unë ajo që ka lënduar efektiven. Nuk ishte e qëllimshme, nuk ishte ajo që kërkonim ne. Kemi dalë për të mbrojtur pronën tonë dhe nuk doja të dëmtohej efektivja. Kur jam shoqëruar për në komisariat jam dhunuar nga katër civilë dhe drejtori. Kur kam shkuar në komisariat po ashtu jam dhunuar dhe nga drejtori. Me grushte, me ofendime dhe shpulla nga më të ndryshmet.
Këtu jam mjekuar, po më kanë dëmtuar civilë, gjatë momentit të shoqërimit. Ndihem më mirë tani. Na kanë pritur shumë mirë dhe kemi mbështetje. Familjarët nuk i kanë lejuar që t’i takoj për shkak të festave. Unë jam 18 vjeç dhe nuk kam bërë një gabim që jam këtu dhe më kanë ndërprerë shkollën. Jam në shkollë në vit të parë për Inxhinieri Ndërtimi, dhe kam mbaruar gjimnazin me mesataren 9.5”, është shprehur 18-vjeçari.
