Gjykata e Tiranës ka lënë të lirë 10 protestuesit që u arrestuan të enjten, pas protestës që u zhvillua përpara parlamentit kundër ndërtimit të Unazës së Re, e cila degjeneroi në dhunë. Në seancën që zgjati rreth 2 orë, gjykata caktoi masën detyrim paraqitje për 10 prej tyre, ndërsa për shtetasin Dorjan Protoduari u vendon arrest me burg.
Prokuroria kishte kërkuar masën e arrestit me burg për gjashtë prej tyre. Ata akuzohen për “Mbajtja pa leje dhe prodhimi i armëve shpërthyese dhe i municionit”, “Kundërshtimi i punonjësit të policisë së rendit publik”, “Organizimi dhe pjesëmarrja në grumbullime dhe manifestime të paligjshme” dhe “Prishja e qetësisë publike” e kryer në bashkëpunim.
Sakaq, edhe 18-vjeçari Daniel Drobaj, pritet të dalë përpara gjykatës, pasi akuzohet se është personi që hodhi kapsollat në drejtim të efektivëve të policisë, ku policja Ina Nuka humbi edhe gishtat.
Gjatë protestës të së enjtes mbetën të plagosur 15 punonjës policie edhe 3 protestues. Policja Nuka u transferua për mjekim të specializuar në një spital të Turqisë.
Burimi: KLAN
