Ditën e sotme një qytetar pretendoi se Kostandin Xhuvani, i dënuari me 35 vite burg për vrasjen e 5 personave, ishte liruar nga burgu dhe për këtë nuk ishte bërë asnjë njoftim.
Drejtoria e Burgjeve hodhi poshtë lajmin, duke e cilësuar si të rremë, pasi Xhuvani ndodhet në Spitalin e Burgut, ku po merr trajtimin e duhur.
Sipas deklaratës zyrtare, Kostandin Xhuvani u shtua më 5 nëntor në Spitalin “Nënë Tereza” për një ndërhyrje kirurgjikale pasi rezultoi me “Prolaps hemoroidal”.
Drejtoria e Burgjeve deklaron se i burgosuri ka qenë në masa të rrepta sigurie dhe më pas u hospitalizua në Spitalin e Burgut.
“Me përmirësimin e gjendjes shëndetësore do të bëhet dalja nga Spitali i Burgut drejt burgut të Fushë-Krujës”, thuhet në deklaratë.
Nga dënimi i dhënë rezulton se Kostandin Xhuvanit i kanë mbetur edhe 30 vite 7 muaj dhe 29 ditë burgim.
Sipas deklaratës së një qytetari, djali i ish-deputetes së Partisë Socialiste dhe aktores, Luiza Xhuvani, u shtrua në QSUT për një ndërhyrje dhe nuk u kthye më në burg, por u mor nga familjarët.
Kostandin Xhuvani, autori i vrasjes se katërfishtë që ndodhi në një lokal në “Rrugën e Elbasanit” në 2014-n, u dënua me 35 vite burg.
Ai mban mbi supe 5 vrasje, përfshirë atë të Alfred Musabellit, më 12 shkurt të vitit 2011. Kostandin Xhuvani u arrestua mëngjesin e 4 nëntorit të 2014-s pranë Fakultetit Ekonomik, pasi kishte qëlluar me pistoletë Edison Jahon dhe Enea Xhajën, dy persona me të cilët kishte patur konflikt të çastit, si dhe mikun e tij Arbër Demirajn dhe shtetasin italian, Gianpaolo Azzola.
DEKLARATA E DREJTORISË SË BURGJEVE:
Nisur nga një lajm krejtësisht i pavërtetë i përhapur në disa portale të disa mediave në vend, pa asnjë konfirmim zyrtar nga Drejtoria e Përgjithshme e Burgjeve, që pretendonte për lirimin e të dënuarit Kostandin Gjergj Xhuvani, sqarojmë sa më poshtë vijon:
Kostandin Gjergj Xhuvani i datëlindjes 24.06.1989, lindur dhe banues në Tiranë, është dënuar më 35 vjet burgim me vendimin Nr.670 datë 10.03.2015 të Gjykatës së Rrethit Gjyqësor Tiranë.
Nga dënimi i dhënë i mbeten për të vuajtur edhe 30 vjet 7 muaj 29 ditë burgim, për kryerjen e veprave penale “Vrasje në Rrethana Cilësuese” dhe “Armëmbajtje pa Leje” parashikuar nga nenet 79/dh dhe 278/5 të Kodit Penal të Republikës së Shqipërisë, dënim të cilin është duke e vuajtur në seksionin e sigurisë së lartë në IEVPenale Fushë Krujë.
Si çdo i dënuar tjetër, edhe të dënuarit Konstandin Xhuvani i garantohen të drejtat e përcaktuara në Ligjin Nr. 8328, datë 14.06.2018, “Për të drejtat dhe trajtimin e të dënuarve me burgim dhe të paraburgosurve” (i ndryshuar).Thënë kjo, ju bëjmë me dije se në datën 30.10.2018 Kostandin Xhuvani është hospitalizuar ne IVSHB (Spitali i Burgut) për disa probleme shëndetësorë, me diagnozë Nodus hemoroidal, me kartelë klinike 407.
Në momentin e pranimit në Spital, pacienti paraqitej i zbehtë, ankonte për këputje trupore dhe dhimbje rektale. Menjëherë janë realizuar ekzaminimet dhe konsulta mjekësore me mjekun specialist proktolog të “ QSUT Nënë Tereza”, ku ka rezultuar me:
– Anemi(Hb 8mg/dl).
– Prolaps hemoroidal.
Në këto kushte, mjeku specialist ka kërkuar ekzaminimin mjekësor sigmoidoskopi. Në datën 04.11.2018, është realizuar ky ekzaminim dhe konsulta me mjekun specialist, ku është rekomanduar ndërhyrje kirurgjikale.
Në datën 05.11.2018 është realizuar ndërhyrja kirurgjikale në QSUT “Nënë Tereza”, i shoqëruar dhe nën mbikëqyrjen e Forcave Operacionale të Drejtorisë së Përgjithshme të Burgjeve.
Po në këtë datë, pas përfundimit të operacionit, pacienti Konstandin Xhuvani është rikthyer në IVSHB (Spitali i Burgut) për trajtim të mëtejshëm sipas rekomandimeve të mjekëve specialistë të QSUT “Nënë Tereza”.
Në ditët në vijim është konsultuar me mjekët specialistë (mjekun hematolog për problemin e anemisë) dhe është trajtuar në IVSHB (Spitali i Burgut) sipas rekomandimeve të tyre.
Aktualisht, ky i dënuar është i hospitalizuar në IVSHB (Spitali i Burgut), dhe me përmirësimin e gjendjes shëndetësore do të bëhet dalje nga IVSHB (Spitali i Burgut) drejt IEVP Fushe Krujë.
