Zbulohet një letër e papublikuar e gruas së Michael Schumacher, e shkruar pas aksidentit të tmerrshëm gjatë kohës që po bënte ski.
49-vjeçarja Corinna Schumacher, e cila është martuar me legjendën e garave të makinave të shpejta për 23 vite, e përshkroi burrin e saj si një luftëtar, i cili nuk do të heqë dorë.
Ajo ia shkroi letrën artistit gjerman Sascha Herchenbach, pasi ai shkroi këngën “Born To Fight” në nder të Schumacher dhe i dërgoi një CD të këngës.
Herchenbach tha se ai nuk priste kurrë të merrte një përgjigje, por mori një letër të shkruar me dorë.
“Doja t’ju falënderoj sinqerisht për mesazhin tuaj dhe dhuratën e bukur, që do të na ndihmojë në këtë kohë të vështirë. Është mirë të marrësh kaq shumë urime dhe fjalë që shprehin mirësi, është një mbështetje e madhe për familjen tonë. Të gjithë e dimë se Michael është një luftëtar dhe nuk do të heqë dorë”, i shkroi ajo.
Herchenbach zbuloi ekzistencën e letrës dhe përmbajtjen e saj në një intervistë për revistën gjermane “Bunte”:
“Nuk prisja që të merrja një përgjigje dhe isha i tronditur. Letra ishte shkruar me dorë dhe e nënshkruar nga Corinna. Ajo shkroi se ishte shumë mirënjohëse për dhuratën”.
Nuk dihet saktësisht se kur ishte shkruar letra, por Herchenbach e shkroi këngën e tij në dhjetor të 2014-s, një vit pas aksidentit të Schumacher.
Kampioni botëror për 7 herë i “Formula 1” u rrëzua teksa bënte ski me djalin Mick në Meribel, në Alpet franceze, më 29 dhjetor 2013.
Schumacher goditi anën e djathtë të kokës në një shkëmb, i cili i çau edhe kaskën. Ai u dërgua në spital ku iu nënshtrua disa operacioneve dhe kaloi gjashtë muajt e ardhshëm në koma.
Burimi: Daily Mail
