Nëse ka një gjë për të cilën Shqipëria nuk është aspak krenare lidhet me numrin e madh të njerëzve që zgjedhin shtetet e tjera, në vend të atdheut. Sipas raportit të Tranzicionit 2019 (publikuar nga Banka Europiane për Rindërtim dhe Zhvillim), Shqipëria renditet e treta për numrin e lartë të emigrantëve në raport me popullsinë që jeton brenda vendit.
Vendi ynë renditet pas Gazës dhe Bosnjës, teksa BERZH përllogariti se 40% e popullsisë që jetonte ende brenda vendit në 2017-n, ka emigruar.
Normat e emigracionit në rajonet e BERZH kanë qenë vazhdimisht më të larta se mesatarja globale. Synimet për të emigruar u rritën ndërmjet viteve 2010 dhe 2015.
Një trend i ngjashëm është vërejtur në vendet me nivele të krahasueshme të të ardhurave. Sipas të dhënave, rreth 20 milionë njerëz në rajonet e BERZH kanë emigruar jashtë vendit në 2015-n.
Të pesë vendet me përqindjet më të mëdha të njerëzve që, raportojnë se duan të emigrojnë jashtë vendit janë të gjitha në Afrikën Sub-Sahariane, me Liberinë që kryeson listën në 14%. Shqipëria renditet e gjashta në botë, me pothuajse 10% të të anketuarve që kishin qëllim emigrimin brenda vitit. Ndërkaq, normat me më shumë se 5% vërehen në Armeni, Kosovë, Maqedoni.
Gaza ka shkallën më të lartë me 3.8 milionë banorë të emigruar, që janë sa 82% të popullsisë së mbetur lokale.
Destinacionet kryesore për emigrantët që lënë ekonomitë në rajonet e BERZH janë Rusia, Gjermania, Ukraina, Shtetet e Bashkuara të Amerikës dhe Kazakistani.
Burimi: Monitor
