Simboli i shqiponjës nga Xherdan Shaqiri, pasi shënoi golin e fitores kundër Serbisë në Kampionatin Botëror në Rusi, shkaktoi shumë polemika.
Ky gjest tashmë i shkaktoi futbollistit shqiptar “përjashtimin” nga skuadra për ndeshjen mes Liverpool-it dhe Crvena Zvezda-s, në kuadër të Ligës së Kampionëve.
Trajneri i skuadrës angleze, Jurgen Klopp, mori vendimin drastik për futbollistin shqiptar dhe këtë e bëri të ditur pas publikimit të listës së lojtarëve.
Në listë mungonte Xherdan Shaqiri, pasi një prezencë e tij në Beograd mund të shkaktonte tensione politike. Trajneri i skuadrës angleze foli për këtë zgjedhje para mediave, për të cilën ra dakord edhe Shaqiri.
“Është një situatë ku do të shkojmë në qytetin fantastik të Beogradit si një ekip futbolli për të luajtur futboll. Kemi dëgjuar dhe lexuar spekulimet, që flasin për atë lloj pritjeje që Shaqiri do të merrte dhe megjithëse nuk kemi ide se çfarë do të ndodhte, ne duam të shkojmë atje dhe të përqendrohemi 100% në futboll. Nuk duhet të mendojmë për ndonjë gjë tjetër, kjo është e gjitha. Shaqiri nuk është i përfshirë dhe ai e pranon dhe e kupton këtë. Shaqiri është lojtari ynë, ne e duam atë dhe ai do të luajë për ne shumë herë, por jo të martën”, tha Jurgen Klopp.
Ndeshja mes dy skuadrave do të nisë sot në orën 18:55.
