Një pedofil italian që po kërkohej prej 4 vitesh nga uniformat blu, u arrestua në Tiranë javën e kaluar. Por tashmë për 45-vjeçarin Masimilliano Croce mësohet një tjetër e vërtetë tronditëse, pasi mbi të mund të rëndojnë edhe akuzat për abuzim me 2 fëmijë shqiptarë.
Historia shokuese u raportua pas arrestimit të 45-vjeçarit italian, i cili prej 2 vitesh bashkëjetonte në periferi të Tiranës me një grua, e cila kishte 2 fëmijë, më i madhi 14 vjeç. Burime të policisë thanë për “News 24” se, pasi ishin marrë në pyetje në praninë e psikologes, të miturit treguan se janë ngacmuar dhe abuzuar seksualisht nga 45-vjeçari.
Gruaja u shpreh se nuk kishte dijeni as për abuzimin me fëmijët dhe as për të shkuarën e errët të italianit. Ajo tregoi për uniformat blu se, ai sillej mirë me fëmijët dhe e ndihmonte financiarisht për të përballuar jetesën.
Pas zbulimit të këtij rasti u ndërprenë procedurat e ekstradimit të 45-vjeçarit, pasi ai do të hetohet për veprën penale të dhunës seksuale ndaj të miturve në Shqipëri.
Masimilliano Croce akuzohet se gjatë viteve 2007-2014 ka kryer krime kundër të miturve, abuzime dhe përdhunime, për të cilat është dënuar me 16 vite burg nga gjykata italiane në vitin 2017. Gjatë kësaj periudhe ai ka shërbyer si mësues komuniteti për fëmijët e varfër dhe jetimë, në provincat e Romës dhe në qytetin e Romës.
Burimi: News 24
