Vdekja e një 13-vjeçareje në zonën e Babrrusë më 11 tetor tronditi opinionin publik. Pavarësisht dyshimeve për vrasje, hetimet dolën në përfundimin se Kasandra Brahja kishte kryer vetëvrasje me armën e gjahut të të atit.
Por sot në emisionin “Me Zemër të Hapur”, babai i të ndjerës, Xhevat Brahja, rrëfeu se vajza e tij nuk mund të kishte kryer vetëvrasje, pasi nuk dinte si ta përdorte armën.
“Me sa e kam rritur unë, atë armë s’ia kam dhënë kurrë në dorë. S’ka pasur as fizikun ta mbajë atë armë, se ishte shumë e fortë. Nuk ka mundësi që vajza ime ta karikonte atë, që të gjuante. Nuk e kam parë të shqetësuar vajzën. S’e mendoj për vetëvrasje. Me nusen nuk ka shkuar mirë, jo vetëm vajza por e gjithë familja, si çdo familje, por jo që të shkojë puna deri këtu. S’kemi pasur asnjë shqetësim. Vajza ime nuk ishte nxënëse e mirë, por as e keqe jo. Mua mësuesit dhe psikologët dhe shokët e shoqet kanë qenë te shtëpia, por nuk më kanë thënë asgjë. Vetëm vështirësitë ekonomike kemi pasur problem, asnjë hall tjetër”, rrëfehet i ati i 13-vjeçares.
Më 11 tetor ai deklaroi se, pasi ishte kthyer nga puna në shtëpi gjeti në divan të gjuajtur me armë vajzën e tij, të cilën e dërgoi në spital ku edhe ndërroi jetë. Në momentin kur ndodhi ngjarja në shtëpi ishin vëllai dhe nusja e këtij të fundit, por policia hasi vështirësi me dëshmitë e tyre pasi çifti është shurdhmemec.
