Një avion nga Indonezia u zhyt mbi 1500 metra në det me 188 pasagjerë në bord këtë mëngjes.
Fluturimi Lion Air JT-610 po shkonte në Pangkal Pinang, një ishull në veri të kryeqytetit, Jakarta, kur humbi kontaktin me kullën e kontrollit rreth orës 6:33, vetëm 13 minuta pas ngritjes.
Pak para katastrofës, piloti i avionit, Bhavye Suneja, kishte raportuar për disa ‘vështirësi teknike’ dhe pak minuta pasi u ngrit në fluturim, kërkoi të kthehej në aeroport, tha një zyrtar.
Kulla e kontrollit i lejoi kthimin, por avioni u zhduk nga radari. Autoritetet nuk janë të sigurta përse u rrëzua avioni. Moti ishte me diell, avioni ishte i ri dhe pilotët me eksperiencë.
Fotografitë e publikuara nga “Daily Mail” tregojnë mbeturinat dhe sendet personale të nxjerra nga sipërfaqja e ujit me anë të anijeve që kanë mbërritur në zonën e rrëzimit.
Këtë mëngjes, presidenti i “Lion Air” tha se avioni kishte një çështje teknike që kërkonte të riparohej.
“U riparua në Denpasar (në Bali) dhe pastaj u dërgua në Jakarta,” tha Edward Sirait për “AFP”.
“Inxhinierët në Jakarta mbajtën shënime dhe bënë një riparim tjetër përpara se të largohej të hënën. Kjo është procedura normale për çdo aeroplan”.
Deri më tani nuk flitet për ndonjë të mbijetuar. Në bord ishin 178 të rritur, një fëmijë, dy foshnja, dy pilotë dhe pesë punonjës të fluturimit. Në bord ishin gjithashtu 20 punonjës nga Ministria e Financave indoneziane dhe 23 zyrtarë qeveritarë në total sipas “Reuters”. Një shtetas italian ishte gjithashtu në bord.
Kreu i agjencisë kërkimore dhe shpëtuese Basarnas, u tha gazetarëve se pjesë trupi ishin parë duke lundruar në oqean pranë vendndodhjes së rrëzimit.
