Prej kohësh qytetarët ankohen se çmimet e biletave për udhëtimet nga Rinasi janë më të shtrenjta, se nga të gjitha aeroportet e rajonit. Veçanërisht këtë verë çmimet e biletave të avionëve kapën majat. Të fluturoje nga Europa drejt Rinasit në fillim të gushtit, bileta në një drejtim arrinte deri në 300 euro.
Dr. Rolf Castro-Vasquez, drejtor ekzekutiv (CEO) i Tirana International Airport, që menaxhon me koncesion aeroportin e vetëm në vend, e pranon që çmimet e biletave në Shqipëri në verë janë një çmenduri.
Në një intervistë për “Monitor”, ai thotë se kjo nuk ka të bëjë me tarifat e aeroportit, që janë gjithë vitin njësoj, por me trafikun e rritur në dy-tre muajt e verës.
“Çmimet e biletave caktohen nga kompanitë ajrore. Nuk e di pse gjithmonë na pyesin ne. Këtu është infrastruktura qendrore dhe ato mund të vijnë. Nuk është problemi im, që ato ofrojnë çmime të larta. Ne nuk jemi të lirë, por nga ana tjetër, kjo nuk është e lidhur me çmimet e biletave. Çmimet e biletave, veçanërisht në kohën e verës, janë të shtrenjta sepse ka shumë njerëz që duan të fluturojnë, jo sepse ne kemi tarifa të larta. Sepse në dimër mund të fluturosh me 99 euro dhe ne kemi ende të njëjtat tarifa. Çdo verë ne kemi të njëjtin diskutim”, shprehet Castro-Vasquez.
Tirana International Airport është gjendur së fundmi nën presionin e institucioneve të ndryshme për uljen e tarifave, që konsiderohen si një nga arsyet e biletave të shtrenjta. Autoriteti i Aviacionit Civil pohon se tarifat e larta që aplikon koncesionari pengojnë shtimin e linjave dhe hyrjen e operatorëve “low cost”.
Burimi: Monitor
