Pavarësisht se nuk ka një motiv zyrtar për ngjarjen që ndodhi mbrëmjen e 4 tetorit në një prej lokaleve në ish-Bllok, Elvana Gjata është cilësuar si “molla e sherrit”.
Këngëtarja është shpallur në kërkim nga policia, pasi mungon dëshmia e saj lidhur me ngjarjen, ndërsa i dashuri i saj Ervin Mata kërkohet si i implikuar në masakrën e javës së kaluar, ku humbi jetën Fabian Gaxha dhe u plagosën dy të tjerë.
Shpallja në kërkim policor e detyron Gjatën, që të paraqitet për të dhënë shpjegime brenda 30 ditëve, në të kundërt do të bëhet shoqërimi i saj i detyruar. Ajo rezulton se është larguar nga Shqipëria më 5 tetor, katër orë pas ngjarjes, por nuk bëhet e ditur vendndodhja e saj.
Elvana Gjata, i dashuri i saj, Ervin Mata, Fabian Allushi dhe Mevjol Bilo, (të tre të shpallur në kërkim) kanë qenë të ulur në një tavolinë, ndërsa kanë nisur konfliktin me palën tjetër ku ishte viktima. Autori i vrasjes së Gaxhës dyshohet se është truproja dhe kushëriri i këngëtares Gjata, njëherësh edhe pjesë e Forcave Komando ushtarake, Mevjol Bilo.
Një prej të plagosurve, Ervis Martinaj, dëshmoi para trupit gjykues ku tregoi se, me Fabianin vriteshe edhe për një shikim dhe këngëtarja nuk ka lidhje fare në këtë ngjarje.
“Ervin Mata është një dele. Ai tani do të jetë në një copë dhomë, duke pirë. Unë s’kam asnjë lloj konflikti me të, por do të flasë me babin e tij dhe do t’i them të vijë të sqarojë. Ai ka frikë se mos ngel në burg, se ju e arrestoni, e mbani kot”, është shprehur Martinaj.
Gjithashtu, 36-vjeçari i plagosur pohoi se komando Mevjol Bilo, të cilin e quan “Kokëmadhi” e qëlloi atë për refleks, ndërsa ka sqaruar që nëse nuk do të kishte ndërhyrë ai (Martinaj), komando do të kishte vdekur, pasi s’kishte mundësi të nxirrte armën.
“Unë, si puna e atyre dy çunave njoh gjithë Tiranën. Në këtë ngjarje kanë qenë palë në konflikt dy persona që kanë hyrë nga jashtë. Personat që kanë qenë të pranishëm fillimisht në lokal nuk kanë lidhje me ngjarjen. Kur unë po pija me Ervin Matën dhe Redin kanë hyrë dy persona nga jashtë lokalit. Njërin prej tyre e njoh, quhej Fabi, ndërsa tjetrin nuk e njoh dhe ata të dy kanë pasur konflikt me një tavolinë tjetër. Të gjithë të tjerët në lokal i kam miq dhe s’kam pasur asnjë konflikt me ta. Kur ata po konfliktoheshin, unë jam futur në mes për t’i ndarë dhe besoj që jam plagosur pa dashje nga “Kokëmadhi”, tregoi gjatë dëshmisë Martinaj.
Burimi: GSH
