Eni Çobani, juristja e njohur nga rubrika ”Shihemi në gjyq”, u shoqërua ditën e sotme në Komisariatin e Gjirokastrës, gjatë kohës që po merrte pjesë në një seancë gjyqësore në këtë qytetet. Eni Çobani, mbronte si avokate Merushe Mengrin dhe është përballur verbalisht gjatë seancës me ish-nusen e djalit të saj, Rudina Islamaj. Është kjo e fundit, e cila ka njoftuar policinë pasi është ndjerë e kërcënuar nga juristja.
Për “Dritare.net”, Rudina Islamaj tregon se procedura e gjykimit filloi normalisht dhe në një moment të caktuar kur u prezantua trupi gjykues, ajo kishte kërkuar përjashtimin e trupit gjykues.
Pikërisht ky ishte momenti , kur ka reaguar avokatja Çobani, e cila fillimisht i është drejtuar trupit gjykues, duke u thënë për Islamajn që është një person i rrezikshëm dhe se duhet kontrolluar para se të hyjë në gjykatë, sepse qarkullon me çimka.
“Ndërsa unë reagova e fyer, pikërisht në Gjykatë, Çobani m’u kthye duke me thënë: ‘Pusho, pusho, ti pusho kur flas unë. E di unë pse e bën ti, por mua këtu do më kesh, nuk do të ndahem. Unë nuk jam as Merushja, as Guximi’”. – tregon Rudina.
Ish-nusja e klientes së Çobanit është ndjerë e ofenduar dhe ka telefonuar policinë. Ajo tregon se juristja u mundua të zbusë gjakrat, kur erdhi policia, duke ju dhënë njohje dhe treguar kush ishte, por policia kishte bërë punën, pa u ndikuar. Pas verifikimeve të bëra, avokatja është shoqëruar në komisariat. Edhe Eni Çobani, edhe Rudina Islamaj kanë dhënë dëshmitë e tyre.
Ndërkohë që ka reaguar edhe Eni Çobani përmes një postimi në profilin e saj në “Instagram”.
“E dua Gjirokastrën sic dua gjithë trevat ku ka shqiptare po këtu kam rrënjët e të parëve të mi dhe ndihem si në shtëpine time. Faleminderit për mbështetjen dhe dashurinë patriotët e mi.” – shkruan Eni Çobani.
