Le t’ua shpjegojmë me pak fjalë! Fillimisht, mos u shqetësoni, pasi Versace do të jetë sërish Versace dhe në krye të saj është sërish Donatella. E vetmja gjë që ka ndryshuar është pronari i kompanisë.
Pak ditë më parë, Michael Kors konfirmoi zyrtarisht se ka blerë kompaninë e Versace për shumën e 2.12 bilionë dollarëve. Dhe me këtë blerje, Michael Kors Holding vendosi të ndryshojë edhe emrin, e u pagëzua si “Capri Holding”. Tanimë, “Capri Holding” përfshin tre kompani të mëdha të modës si: Michael Kors, Jimmy Choo dhe Versace.
Michael Kors ka ndjekur të njëjtat kritere në marrëveshje si edhe me kompaninë Jimmy Choo, ndaj Donatella Versace do të vijojë të jetë drejtoresha kreative e kompanisë.
“Ky është një moment shumë emocionues për Versace-n. Për më shumë se 20 vite, po drejtoj kompaninë me tim vëlla Santo dhe vajzën Allegra. Jam shumë krenare që Versace qëndroi e fortë në industrinë e modës. Santo, Allegra dhe unë jemi të sigurtë që ky hap do të mundësojë që Versace të arrij potencialin e duhur.” – u shpreh Donatella Versace.
Ndaj për adhuruesit e modës, asgjë nuk do të ndryshojë, do të vijojnë të shohim krijimet brilante të Donatellës. Ndërsa kjo e fundit, ka një pronar mbi kokë.
Burimi: Harper’s Bazzar
