Haxhi Lika është 77-vjeçari që u qëllua nga forcat RENEA, gjatë një operacioni në orët e para të mëngjesit të së premtes në fshatin Remas të Lushnjës.
Në një intervistë për “News 24, Haxhi Lika ka rrëfyer për herë të parë versionin e tij të ngjarjes. Ai tregon se u dërgua menjëherë në spital, pasi policia e qëlloi në kokë, teksa po përpiqej të vishte pantallonat.
“Dëgjova një zhurmë, atje ishte policia. Unë isha duke veshur pantallonat drejt dritares, se ishte dritarja drejt krevatit dhe më qëlloi policia. Unë kam një armë në banesë, por nuk e kam prekur fare. Nuk e dimë përse policia erdhi na shqetësoi dje. Unë kërkoj drejtësi, të di përse u qëllova në shtëpi.” – tha 77-vjeçari.
Ndërsa Policia e Shtetit me anë të një njoftimi për shtyp njoftoi më herët se në banesën e 77- vjeçarit, ishin ngritur dyshime se fshiheshin dy të akuzuar për vrasje. Sipas policisë, Haxhi Lika ka dalë në dritare me armë gjahu, pas thirrjeve të policisë. Gazetarja e “News 24” Klodiana Lala ka pyetur Haxhi Likën, nëse i njeh dy personat që janë në kërkim për vrasje.
“I njihni shtetasit Orgest Bilbili dhe Laert Haxhiu?” -pyet gazetarja.
“Jo nuk e njoh asnjërin nga ata. Nuk i njoh.” – përfundon Haxhi Lika.
