Shtetet e Bashkuara të Amerikës po kalojnë ditë jo fort të mira për shkak të uraganit Florence, i cili të premten në darkë dhe gjatë orëve të mëngjesit ka goditur Karolinën e Veriut dhe atë të Jugut, me një shpejtësi ere që arriti në 120 kilometra në orë.
Autoritetet kanë paralajmëruar se ky uragan kishte fuqinë të shkaktonte viktima dhe mesa duket kështu ndodhi. Deri më tani janë shënuar të paktën pesë viktima, midis tyre edhe një nënë me fëmijët e saj.
Sipas të dhënave rezulton se janë evakuuar rreth 600 mijë banorë nga shtëpitë e tyre, ndërkohë që shumë të tjerë kanë mbetur pa energji elektrike ditën e premte.
Parashikohet që situata të përkeqësohet në Karolinën e Veriut.
“Me ardhjen e stuhisë së fuqishme që shkakton dallgë të mëdha në oqean, lumenjtë që derdhen atje do të tej mbushen, duke shkaktuar përmbytje në zonat përreth.” – ka thënë ditën e djeshme Guvernatori i Karolinës së Veriut, Roy Cooper.
Ndërkohë sipas parashikimeve të motit, Uragani Florence pritet të dobësohet ditën e sotme pasi të kalojë në pjesën qendrore të Karolinës së Jugut.
