Gati një muaj më parë u bë publik vendimi i Ministrisë së Arsimit për mospërdorimin e telefonave celularë gjatë procesit mësimor. Urdhri hyri në fuqi menjëherë dhe do të nisë të zbatohet në datën 17 shtator me nisjen e mësimit në shkollat e mesme dhe ato 9-vjeçare.
Mirëpo shumë shpejt duket se telefonat celularë nuk do të lejohet të përdoren as në institucionet e shtetit. Për këtë lajmin e ka dhënë vet kryeministri Rama, gjatë takimit me mësuesit e punësuar nga portali. Ai ka thënë se do të përgatitet vendimi që do të ndalojë përdorimin e celularëve edhe në institucione.
“Nuk do të lejomë celularë në shkolla, as për fëmijët e më vjen keq as për mësuesit. Mësuesit duhet t’i dorëzojnë në fillim të mësimit dhe t’i marrin në mbarim të tij. Muajin e parë duhet ta bëjmë muaj edukimi, muajin e dytë merren dhe hidhen në plehra dhe nuk i kthehen më atij, se janë ndotës të rrezikshëm të mjedisit arsimor. Dhe ç’bëjmë me lëndët ndotëse me rrezikshmëri të lartë? I varrosim dhe i riciklojmë. Ndërkohë po përgatitemi dhe për vendimin që të heqim celularët nga institucionet që janë bërë si klube interneti të gjithë”, tha kryeministri Rama.
