Mbretëresha e muzikës “Soul” Aretha Franklin, është ndarë nga jeta mëngjesin e së enjtes në shtëpinë e saj në Detroit. 76-vjeçarja humbi jetën si pasojë e luftës me kancerin në pankreas.
“Në momentet më të errëta të jetës sone, e kemi të pamundur të gjejmë fjalët e duhura për të përshkruar dhimbjen që na ka pushtuar zemrën. Kemi humbur forcën e familjes sonë. Ju falenderojmë të gjithëve për lutjet.” – shkruante familja e saj në deklaratën,ku njoftonin humbjen e këngëtares amerikane.
Këngëtarja e hitit “Think”, ″I Say a Little Prayer” apo edhe “Respect” hoqi dorë nga koncertet vitin e kaluar, si pasojë e problemeve shëndetësore.
“Do të vazhdoj të regjistroj muzikë, por ky do të jetë viti im i fundit nëpër koncerte”, njoftoi ajo gjatë një interviste radiofonike në shkurt të vitit të kaluar.
Aretha Franklin ka dhënë kontributin e saj në shkrimin e historisë amerikane. Mbretëresha e “soul” ka performuar në funeralin e Martin Luther King Jr. në vitin 1968. Ndërsa babai i saj, ka organizuar një ndër marshimet më të mëdha për barazi racore në Detroit, aty ku Luther Kingu mbajti fjalimin e titulluar “Kam një ëndërr”.
Aretha ishte e para femër e përfshirë në Hollin e Famës së “Rock and Roll”-it në vitin 1987, ndërkohë që ka kryesuar edhe listën e “artistëve më të mirë të të gjitha kohërave” të “Rolling Stones”. Ajo ka fituar 20 çmime “Grammy” gjatë karrierës së tij, përfshi edhe 3 nderime speciale: çmimin e legjendës (1991), çmimin e arritjeve jetësore (1994) dhe personi i vitit nga “MusiCares” në vitin 2008.
https://www.youtube.com/watch?v=KtBbyglq37E
