Familja e autorit të masakrës së Selenicës deklaruan në Polici se debati mes djalit të tyre dhe viktimave e kishte zanafillën tek akuzat e të ndjerëve se Ritvan Zykaj u kishte vjedhur pesë pula deti. Mirëpo duket se ngjarja nuk është vetëm kaq. Banorët e fshatit Resulaj shprehen se midis dy familjeve ekzistojnë disa konflikte të hershme për çështje pronash.
Sipas tyre, familja e tetë viktimave kishte jetuar më parë lart në kodrine, shkruan “Panorama”. Pas viteve 2000, ata kishin zbritur në fshat ku ndërtuan banesat në tokat e tyre. Por kjo nuk është mirëpritur nga familja e autorit të krimit. Madje, kanë pasur mosmarrëveshje për një pjesë të kësaj prone.
Nënkryetari i Bashkisë së Selenicës, Neim Veshaj, tregon se ishte në dijeni të debatit nga banorët e fshatit, por se dy familjet nuk kishin ardhur asnjëherë të ankohen në bashki.
Ndërkohë që dyshohet se familjarët e tetë viktimave kanë zgjedhur pikërisht pronën e tyre për t’i varrosur dhe jo varrezat e fshatit. Një veprim i tillë nga ana e të mbijetuarve dhe familjarëve të tjerë të viktimave, dyshohet të jetë kryer edhe si një formë për t’i treguar familjes tjetër, djali i së cilës kreu këtë masakër, se kjo pronë do të jetë tashmë e tyre.
