Një banesë është përfshirë nga flakët pasditen e sotme në fshatin Grecall të Fierit. Pronari i banesës Ardian Gjika ka akuzuar bashkëshorten e tij, si shkaktaren e zjarrit. Në një prononcim për “News 24”, ai pohoi se momente përpara zjarrit kishte qënë në shtëpi së bashku me gruan e tij, e cila vuante nga depresioni. Burrë e grua kishin nisur të debatonin dhe Ardiani kishte ikur nga shtëpia dhe kishte shkuar në një fshat aty pranë, Daullas. Ai tregon se gruaja e tij pasi i ka vënë flakën banesës, është larguar nga vendi i ngjarjes. E gjithë shtëpia, është shkrumbuar dhe nuk ka asnjë person të lënduar.
“Bë vaki do të ketë qenë me depresion. Më tha se do të iki te nëna. Mbrëmë ishte. I thashë do të çoj në darkë. Kemi dy fëmijë të vegjël. Mos u mërzit i thashë se marr makinën dhe në darkë do të shkojmë. Është dëmtuar tërë malli që kisha. Tërë banesa. E pata 6 muaj përpara dhe iku dhe më tha mua do vij” – është shprehur pronari i shtëpisë.
