Ditën e djeshme reperi i njohur French Montana ka rënë pre e grabitjes. Dy persona të armatosur kanë hyrë mëngjesin e së martës në shtëpinë e tij me synim që ta grabisnin.
Burime pranë “TMZ” kanë zbuluar se në momentin e grabitjes reperi i njohur kishte qenë në shtëpinë e tij në Kalabasas. Policia e cila u njoftua për ngjarjen rreth orës 9-të të mëngjesit është duke e hetuar ngjarjen, por ende nuk dihet se kush ishin dy personat e armatosur, të cilët hynë në shtëpinë e reperit.
Gjithashtu ende nuk është zbuluar nëse ka pasur dëme materiale, apo se çfarë ata kanë arritur të grabitin, por policia është duke punuar për të zbuluar gjurmët e tyre.
Karim Kharbouch, të cilin ne e njohim si French Montana, ia ka blerë këtë shtëpi këngëtares Selena Gomez. Edhe ajo mësohet se ka rënë pre e grabitjes në vitin 2014 dhe policia arriti ta arrestonte personin përgjegjës.
Me sa duket kjo shtëpi qenka gjithmonë në shënjestër të grabitësve dhe French Montana, i cili është një emër i dëgjuar për shqiptarët për bashkëpunimet me Era Istrefin dhe Dafina Zeqirin, duhet të mendohet mirë për sigurinë e shtëpisë së tij apo për qëndrimin e mëtejshëm në të.
