Një person i armatosur ka hapur zjarr në një zyrë të gazetës lokale “Capital Gazette” në Maryland, SHBA, duke vrarë pesë vetë dhe duke plagosur të tjerë.
Mediat amerikane kanë identifikuar një të dyshuar të mbajtur nga policia si Jarrod Ramos, i cili thuhet se ka paditur grupin e gazetave në vitin 2012 për shpifje. Agresori ka përfunduar në pranga, pasi qëlloi me një armë gjahu dhe granata tymi, përmes një dere qelqi në redaksi.
“Ky ishte një sulm që kishte si shënjestër Capital Gazette”, tha William Krampf, zëvendës shefi i Policisë së Qarkut. Ai shtoi se njeriu i armatosur “hyri në ndërtesë me një armë gjahu dhe kërkoi viktimat e tij ndërsa ai ecte nëpër katin e poshtëm”.
Ekzekutivi i qarkut Steve Schuh tha për “CNN” se i dyshuari ishte fshehur nën një tavolinë në ndërtesë kur oficerët e policisë arritën “brenda 60 sekondave” për të marrë lajme për incidentin. Ai tha se nuk kishte “asnjë shkëmbim zjarri”.
Ndërkohë gazetarët dhe kolegët e viktimave kanë punuar për të nxjerrë sot numrin e ri të gazetës.
“Capital Gazette” është një e përditshme e shtypit të shkruar në qytetin Annapolis të Maryland-it, ndërsa gazeta e saj simotër, “Maryland Gazette”, e cila daton që në 1884 dhe është në pronësi të Baltimore Sun Media Group.
