Thomas Markle theu më në heshtjen, pas mungesës së tij në dasmën mbretërore në një intervistë për “Good Morning Britain”, ku nxorri sekrete edhe të marrëdhënies së Meghan dhe Harry. Thomas rrëfeu se ende nuk e ka takuar dhëndërin e tij dhe se Harry i kërkoi dorën e Meghan, pas disa telefonatave në muajin dhjetor.
“I thashë që je xhentëllmen, më premto që kurrë nuk do ngresh dorë mbi vajzën time dhe sigurisht që unë do ta jap bekimin dhe lejen time. Vajza ime ka qenë një princeshë që nga dita kur ka lindur dhe Harry ka bërë zgjedhjen më të mirë”, – u shpreh babai i Dukeshës së Sussex.
Thomas Markle nuk mundi të shoqëronte vajzën e tij në altar, pasi doktori i ndaloi fluturimin drejt Londrës, si pasojë e problemeve shëndetësore me zemrën. Ai zbuloi se dasmën e pa në ekranin e televizorit dhe se nuk mundi të përmbante dot emocionet.
“Ajo ishte shumë e bukur. Qava kur e pashë. Isha shumë krenar dhe nuk mund të shihja një moment më të bukur në gjithë jetën time. E gjithë bota po shihte vajzën time. Humba ditën më të madhe në histori, atë kur babai duhet të shoqërojë vajzën në altar. Nuk mund të mendoja për një njeri më të mirë se Princi Charles për të më zëvendësuar në këtë detyrë. U ndjeva pak xheloz. Doja shumë që të isha unë, por falë Zotit gjithcka shkoi mirë”, u shpreh babai i Meghan Markle.
Markle theksoi se mezi pret të udhëtoj drejt Londrës për të takuar çiftin mbretëror dhe ndoshta edhe Mbretëreshën Elisabeth II. Sipas gazetarit Piers Morgan, Thomas Markle përfitoi disa paund për këtë intervistë ekskluzive me “Good Morning Britain”.
