Një aksident i papritur ka ndodhur gjatë orëve të para të mëngjesit të sotëm në koncertin e Bruno Mars në Hollandë.
Një automjet i përshkruar si një furgon i bardhë ose mini autobus u fut në grupin e fansave gjatë festivalit të famshëm “PinkPop” në Landgraaf në Hollandë.
Ky incident i cili nuk dihet akoma nëse ishte i paramenduar apo aksidental, ka rezultuar fatal pasi ka lënë të pajetë një person dhe të plagosur tre të tjerë.
Pas aksidentit automjeti është larguar menjëherë nga vendngjarja dhe policia ka deklaruar se janë ende në kërkim të automjetit dhe shoferit.
Një deklaratë shtoi se rruga Mensheggerweg ku ndodhi aksidenti ishte mbyllur për hetim.
Në llogarinë zyrtare në Twitter organizatorët e festivalit konfirmuan incidentin dhe thanë se ishin thellësisht të tronditur dhe do të mbështesin viktimat dhe familjarët e tyre.
“PinkPop” është një festival tre-ditor ku marrin pjesë dhjetëra mijëra fansa çdo verë. Bruno Mars kishte mbaruar përformancën e tij vetëm pak orë para se të ndodhte ngjarja e trishtë.
