Vrasja makabre e gjyqtares Fildeze Hafizi nga ish-bashkëshorti vitin e kaluar, tronditi mbarë opinionin publik. Ndërkohë që nuk ka kaluar shumë kohë nga kjo ngjarje e dhimbshme, ditën e djeshme është ndarë nga jeta edhe babi i saj.
Para se të ndahej nga jeta, ai ka shkruar një letër ku kërkon drejtësi në emër të vajzës së tij.
Gazeta “Panorama”, ka publikuar letrën që ka shkruar babai i gjyqtares Fildeze Hafizit, të cilën ai ia ka dërguar Presidentit Ilir Meta, ministres Etilda Gjonaj, kreut të Gjykatës së Lartë Xhezair Zaganjori dhe ambasadorëve Donald Lu e Romana Vlahutin.
Në këtë letër i ndjeri lutet që të mos zvarritet procesi gjyqësor i së bijës dhe të vendoset drejtësi për ata që janë lënduar.
“Unë që po ju shkruaj, jam Bynjamin Hafizi, babi i Gjyqtares së ndjerë Fildeze Hafizi . Nëpërmjet kësaj shkrese do të shprehë shqetësimin tim në lidhje me zvarritjen e gjyqit të vrasësit të sime bije Fadil Kasemit. Kjo zvarritje e radhës na ka tronditur pa masë duke na lënduar për të disatën herë. Në mënyrë të tillë që të fillojë shqyrtimi gjyqësor dhe ky vrasës të dënohet siç e meriton. Po kërkojmë që drejtësia të vihet në vend të paktën kësaj radhe. Jemi të lënduar dhe i vetmi ngushëllim do të ishte vënia e drejtësisë”, ka shkruar ai në letrën e tij.
