Çdo fundjavë të gjithë kemi dilemën se çfarë do të bëjmë apo ku do ta kalojmë atë. Këtë fundjavë parashikohen që temperaturat të jenë të larta dhe relativisht shkojnë deri në 30 gradë. Dhe duke pasur parasysh këtë fakt ne iu sugjerojmë që t’i drejtoheni plazhit. Një fundjavë në plazh është jo vetëm rekalusese, por edhe tepër argëtuese.
Destinacioni jonë i kësaj javë është plazhi i Kallmit, i cili njihet si një plazh i virgjër dhe me ujëra tepër të pastra.
Foto marrë nga “Top Channel”
Ku ndodhet plazhi i Kallmit?
Ai ndodhet vetëm 8 kilometra larg qendrës së qytetit të Durrësit. Plazhi i Kallmit shtrihet në pjesën perëndimore të këtij qyteti bregdetar, përtej Currilave dhe është një ndër të vetmet plazhe që ka arritur t’i shpëtojë dorës shkatërruese të njeriut. Nga Tirana deri tek plazhi i Kallmit zgjat rreth 50 minuta. Rruga deri tek Currilat është e mirë dhe mund të përshkohet me makinë, ndërsa nga Currilat deri tek plazhi i Kallmit është një rrugë me një infrastrukturë jo të mirë.
Për këtë arsye sugjerohet që këtë pjesë rruge ta bëni më këmbë ose me një makinë fuoristradë, dhe kjo do të ishte zgjidhja ideale. Pavarësisht kësaj pjese rruge që nuk është e mirë dhe ka vështirësitë e saj, të gjithë ata që kanë shkuar tek plazhi i Kallmit kanë mbetur të mahnitur dhe thonë se ia vlen lodhja.
Çfarë na ofron plazhi i Kallmit?
Ai ka qenë dikur një zonë ushtarake që pas viteve 90’-të iu kthye komunitetit, por mungesa në investime për infrastrukturën rrugore i ka mbajtur larg pushuesit dhe ai ka arritur që të jetë ende një plazh i virgjër, që nga dita në ditë po eksplorohet nga turistë të shumtë jo vetëm shqiptarë, por edhe të huaj.
Për të gjithë adhuruesit e plazheve të vegjël, të freskisë, qetësisë dhe pastërtisë kjo zonë është zgjedhja ideale. Plazhi me guralecë dhe ujë të pastër, me shkëmbinj të kthyer në dallgëthyese dhe trampolina natyrore, e bën këtë një plazh të adhuruar dhe të kërkuar nga të gjithë.
Çfarë mund të bëjmë gjatë kësaj fundjave tek plazhi i Kallmit?
Duke parasysh temperaturat e larta që pritet të jenë këtë fundjavë, plazhi i Kallmit është vendi ideal për të marrë rrezet e para të diellit dhe për t’u zhytur në ujërat e tij të pastra. Mund ta shfrytëzoni edhe për të bërë “hiking” në kodrat e gjelbërta që e rrethojnë atë.
Gjithashtu mund të vizitoni edhe mullinjtë e erës që ndodhen në zonë.
Foto marrë nga @visitalbania
Duke pasur parasysh se është një vend shumë piktoresk këtu mund të realizoni edhe foto yll të bukura dhe do të çmendni gjithë Instagarm-in.
Foto marrë nga @albanian.tourism
Çfarë duhet të marrim me vete?
Rrobat e plazhit janë aksesori i parë që ju duhen me vete. Nuk duhet të mungojnë as kremrat mbrojtës ndaj diellit pasi me siguri kjo mund të jetë hera e parë që ju shkoni në plazh për këtë vit.
Një aparat fotografik ose një celular me “full battery” duhet ta keni gjithmonë me vete duke pasur parasysh natyrën piktoreske që e rrethon.
Foto marrë nga @Faton Plaku
