Ditën e sotme, qarkulluan lajme se moderatori i emisionit “Opinion” Blendi Fevziu do të braktisë ekranin e “Tv Klan” pas 20 vitesh bashkëpunim, për t’u zhvendosur në një tjetër televizion. Sipas gazetës “Tema”, shkak për këtë transferim janë bërë problemet me administratorin e këtij televizioni, Aleksandër Frangaj.
Lajmi është konfirmuar edhe nga Blendi Fevziu, i cili i kontaktuar nga “Alpenews.al” është shprehur se ekziston një ofertë nga televizioni “Top Channel”.
“Ende nuk e kam vendosur. Kam biseduar me Top Channel”, ka thënë gazetari i pyetur nëse ka patur një ofertë konkrete.
Përflitet se Blendi do ta zhvendosë emisionin e tij në “Top Channel”, pasi ai ndihet më i sigurt me praninë e Ben Blushit në këtë televizion. Emisioni “Opinion”, thuhet se do të transmetohet në “Top Channel” në orarin prime time nga e hëna në të enjte dhe ka siguruar një kontratë më të shtrenjtë se në “Tv Klan”.
Ndërkohë në Facebook, faqja e “Opinion” ka ndryshuar emrin nga “Opinion TV Klan” në “Opinion TV show” çka i ka shtuar akoma më shumë zërat e largimit.
