Gjithë opinioni publik u trondit ditën e diel nga ngjarja tragjike që ndodhi brenda një familjeje shqiptare në Itali. Xhevdet Mehmeti pas një sherri brenda familjes goditi me thikën e kuzhinës bashkëshorten e tij Elca Tereziu në sy të djalit 17 –vjeçar.
Mediat italiane duke iu referuar deklaratës së dhënë nga avokati mbrojtës i 57-vjeçarit shqiptar, shkruajnë se shkak i sherrit tragjik u bë një mesazh që gruaja pa në telefonin e bashkëshortit. Thuhet se ky ishte një mesazh që Xhevdeti ia kishte dërguar një kushërirës së tij në moshë, por me një emoji në fund, të cilën siç raportohet gruaja e kishte keqkuptuar dhe u bë shkak i sherrit.
Menjëherë pas kësaj, mësohet se shqiptarja ka telefonuar të vëllanë duke i treguar sjelljen e papërshtatshme të të shoqit. Më pas në familjen Mehmeti ka nisur sherri, me hedhje sendesh të forta dhe në një moment burri ka rrëmbyer thikën dhe ka qëlluar mbi bashkëshorten.
“Nga sot jeta ime ka marrë fund”, mësohet të ketë thënë 57-vjeçari në deklaratën e tij në polici.
Shkaqet e kësaj ngjarje tragjike ende mbeten të paqarta, megjithëse mediat italiane, nisur nga deklaratat e avokatit mbrojtës të Xhevdetiti, kanë shkruar se kjo ka qenë një familje problematike për shkak të xhelozisë së vazhdueshme të bashkëshortes.
“Është shumë i tronditur dhe po kupton atë që ka bërë, pavarësisht se nuk e mban mend mirë sulmin ndaj gruas”, ka thënë avokati i shqiptarit.
Burimi: Panorama
