Një ngjarje e shokuese ka ndodhur ditën e djeshme në një sallë gjyqësore në qytezën Githeos në Peloponez. Një shqiptar, Dritan Mullahu, ka nxjerrë një armë dhe ka tentuar të vras një personazh të njohur grekë dhe ka marrë peng 13 persona.
Në këtë seancë gjyqësore po gjykohej padia e familjes greke, shefe kuzhine e mirënjohur nga televizionet greke, Maria Panagaku, për intrigë, keqpërdorim të emrit dhe mashtrim. Ndërsa shqiptari Dritan Mullahu ishte në rolin e dëshmitarit, i cili me sa duket e urrente këtë familje pasi kishte marrë në punë ish-bashkëshorten e tij pas divorcit.
Krejt papritur shqiptari Dritan Mullahu ka nxjerrë një pistoletë me 3 fishekë dhe e ka vendosur në kokën e djalit të Panagarku-t duke e kërcënuar me vdekje.
“Dritan Mullahu, ishte thirrur si dëshmitar në një çështje ku njërën nga palët në konflikt ai e urrente për shkak se kishin marrë në punë ish-bashkëshorten e tij pas divorcit. Ndërsa gjyqi kishte filluar, ai i ka vënë në ballë revolverin atij personi, duke i thënë ‘më ke shkatërruar jetën, do të vdesësh’”, është shprehur një qytetar i cili ishte i pranishëm në sallën gjyqësore.
Një police e re e cila ndodhej në sallën e gjyqit ka tentuar ta qetësoj dhe t’i marrë armën, atëherë Mullahu ka tërhequr këmbëzën, por arma nuk shkrepi. Ndërkaq policja është detyruar që ta lërë përtokë edhe pistoletën e vet, të cilën më pas ia ka rrëmbyer 41-vjeçari dhe me dy armë në dorë iu kanosej të pranishmëve në sallën e gjyqit. Ai nuk u mjaftua me kaq, por mori peng edhe 13 persona të cilët ishin të pranishëm në sallën e gjyqit.
Por, në një moment, dy prej të pranishmëve në sallë iu hodhën përsipër dhe e kanë çarmatosur, ndërsa policja i ka hedhur prangat.
41-vjeçarit iu sekuestrua revolveri dhe gjashtë fishekë, ndërsa dosja penale kundër tij përmban akuzat e vrasjes me dashje në tentativë, grabitje, prishje e seancës gjyqësore dhe shkelje e legjislacionit për armët.
Ndërkohë mësohet se Dritan Mullahu ishte liruar nga burgu vetëm pak kohë më parë pasi kryente dënimin për rrëmbim të miturish dhe trafik emigrantësh të paligjshëm. Pasi kishte dalë nga burgu ai ishte divorcuar edhe nga gruaja, ndaj së cilës ushtronte dhunë vazhdimisht.
