Nënës së 22-vjeçarit nga Tirana, Marvi Mihali, që humbi jetën pas një sherri të dhunshëm pranë stadiumit “Dinamo” në korrik 2017, i janë hapur sërish plagët në zemër, pasi gjykata vendosi për lirimin e 3 bashkëpunëtorëve në krim.
Ai u godit me thikë nga Eugen Bitraj pas një sherri që nisi për një karikues telefoni. 22-vjeçari u gjet në rrugë me plagë të shumta thike në trup. I riu u dërgua në spital por nuk arriti të mbijetojë. Sakaq nëna e tij ka bërë një status mjaft prekës në Facebook.
Ajo fajëson prokurorin e çështjes Artan Lulaj për të cilin thotë se ka liruar nga burgu “kriminelët që bashkëpunuan në vrasje dhe dhunuan trupin” e djalit të saj të vetëm. Mira Mihali shkruan se lirimi i tyre është bërë kundrejt një pagese.
“Sot është një ditë e zezë për mua! Marvin tim ma vranë përsëri!. Tre nga kriminelët që bashkëpunuan në vrasje dhe dhunuan trupin e tij, në momentet e fundit ndërsa djali jepte shpirt, prokurori monstër, vampir, demoni, sharlatani, maskarai Artan Lulaj i etur për para, i kishte liruar nga burgu pa e ditur askush!O zot çfarë tmerri!Të shikosh vrasësit e birit të vetëm pa akuzë, të lirë në sallën e gjyqit dhe tek i shihja më dilte parasysh video e ngjarjes, shkelmat e tyre mbi trupin e djalit tim! Sa më e madhe se kaq duhet të jetë dhimbja?Dhe çfarë torturash të tjera duhet të kaloj!Më thoni o njerëz, çfarë duhet të bëj në këtë vend?Si do ta vendos drejtësinë?Ju lutem më ndihmoni…”, shkruan në profilin e saj Mira Mihali, nëna e Marvin Mihalit.
Si ndodhi sherri
Sherri nisi në lokal mes 19-vjeçarit Dejvi Bitraj dhe 22-vjeçarit Marvi Mihali për një karikues telefoni. Marvi kishte blerë një telefon te Dejvi dhe po i kërkonte edhe karikuesin.
Ky i fundit e tërhoqi jashtë Marvin në parkingun e makinave të lokalit dhe pasi janë rrahur ka thirrur në ndihmë kushëririn dhe shokët e tij. Në ndihmë të Dejvit kanë shkuar Eugen Bitraj (autori), Kridens Alla,19 vjeç dhe Marsel Alla, 23 vjeç.
Gjatë konfliktit Eugen Bitraj nxorri thikën dhe goditi shtetasin Marvi Mihali, i cili për pasojë gjeti vdekjen në spital.
