Në maj të 2016-s deputetit shqiptar Koço Kokëdhima iu hoq mandati, por pavarësisht kësaj ai vijon që të kërkojë hapësirë në politikën shqiptare, tashmë me partinë “Zgjidhja”.
Dhe një nga dëshirat e tij ishte të t’ia lironte vendin të bijës. Mbrëmjen e djeshme, ndoshta shumë persona nisën të dyshonin se plani i “fshehtë” i tij ishte, që të përfshinte vajzën më të madhe, këngëtaren Besa Kokëdhima, në politikë.
E ftuar në emisionin “Top Show”, ajo u pyet nëse në të ardhmen e sheh veten si deputete apo a do të ndjek ajo rrugën e të atit.
Nga përgjigjja e këngëtares kuptuam se politika dhe Besa janë në rrugë të ndryshme, por ndikimi i të atit ekziston.
“Njeriu mund të investojë në një të ardhme të caktuar. Unë nuk jam duke investuar për një të ardhme të atillë. Madje unë besimin në politikën shqiptare e kam humbur dhe jo pa arsye dhe shpresoj shumë që në gjithë punën që im atë po bën të mbërrijë në një moment që unë të besoj se do të ndodhë një lloj çlirimi i një lloj fryme që të zë ngërç. Unë nuk dëshiroj që njerëzit të influencohen nga mendimet e mia. Këto janë mendimet e mia. Në këtë moment, mua nuk më frymëzon fare, fatkeqësisht, kjo fushë, për arsye se nuk mendoj që manifeston vlerat më të mira të këtij vendi”, tha Besa.
