Prej disa kohësh, ajo ka braktisur Shqipërinë për të ngjitur shkallët e suksesit si balerinë në Italinë fqinje. Por krahas punës si balerinë, Klaudia Pepa së fundmi ka nisur të eksperimentojë dhe në një tjetër fushë: Në atë të prezantimit televiziv.
Siç ishte paralajmëruar pak kohë më parë, Pepa do të drejtonte një emision televiziv në platformën “Sky Italia” dhe tashmë duket se një gjë e tillë është bërë realitet.
Balerina e njohur ditën e sotme ka surprizuar ndjekësit e saj duke publikuar pamje nga emisioni i titulluar “Top The Top”, në të cilin ajo vjen për herë të parë në rolin e prezantueses. Siç shihet në video, Pepa flet rrjedhshëm në gjuhën italiane dhe ka një marrëdhënie mjaft të mirë me kamerën, ndërkohë që në studion e emisionit ndodhen emra të rëndësishëm të artit italian si Ivana Spagna etj.
“Epo, eksperienca ime e parë si bashkë-prezantuese. Më uroni fat!”-shkruan Klaudia në përshkrimin e videos ku kanë vërshuar komentet që i urojnë asaj sukese.
