Në një intervistë të pak kohëve më parë në “Pasdite në Top Channel”, aktori i spektaklit të humorit “Portokalli”, Alex Seitaj, tregoi për herë të parë se përgjatë adoleshencës kishte qenë viktimë e bullizmit, gjë që e kishte çuar drejt depresionit, dëmtimit të vetes e madje edhe mendimeve për vetëvrasje.
Megjithatë, duket se tashmë Seitaj i ka lënë pas këto probleme dhe në një intervistë të re për “Panorama Plus”, ka rrëfyer se ato momente, sot janë kthyer në një burim frymëzimi për të, pasi e tija, është një histori mbijetese. “Tani ajo periudhë është shndërruar për mua si një burim frymëzimi. Unë kam vazhduar të flas kundrejt sensibilizimit të njerëzve ndaj problemeve psikologjike dhe mendore, si depresioni apo ankthi. Më vjen mirë që shumë më kanë shkruar, duke u identifikuar me historinë time dhe duke kuptuar që me guxim dhe ndihmën e duhur gjithçka do të shkojë mirë. Në fund të fundit, historia ime nuk ësh-të një histori dorëzimi, por mbijetese. Dhe këtë duhet ta dinë të gjithë ata që po kalojnë kohë të vështira në jetën e tyre.”-është shprehru aktori dhe tekstshkruesi i njohur.
